Is-sigrieti ta’ Juan Mamo mikxufa

Abstract

Din it-teżi tiġbor fiha analiżi tal-ktieb straordinarju Ġabra ta’ Sigrieti tal-1934. Din ir-riċerka hija parti mir-riċerka li qed issir minn għadd ta’ studenti u studjużi biex tistħarreġ aspetti differenti tal-personalità ta’ Mamo. L-għan tiegħi huwa li ntella’ fil-wiċċ l-interessi, l-ambizzjonijiet u l-fehmiet tal-awtur li jispikkaw f’dan il-ktieb mhux tas-soltu. Dan il-ktieb mhuwiex interessanti biss minħabba l-kontenut innifsu, iżda wkoll għax il-kontenut jgħallimna ħafna dwar Mamo. Bħala bniedem li kien jemmen fl-edukazzjoni, kien dejjem jara x’se jitgħallem u x’se joħloq, u permezz ta’ xogħlu ried jgħaddi dak li jaf lill-poplu. F’dan il-ktieb tinħass il-vokazzjoni didattika tiegħu biex in-nies ma jħallux lil min iqarraq bihom. Mamo kien tal-fehma li dawn is-sigrieti li ppreżenta f’dan il-ktieb kellhom ikunu ta’ għajnuna kbira għall-ħaddiema Maltin biex jintrefgħu mill-qagħda miżera tagħhom. Peress li kien jinteressa ruħu f’ħafna oqsma, ma neħduhiex bi kbira li f’dan il-ktieb insibu “sigrieti” li jittrattaw temi li ma tantx kienu popolari f’Malta dak iż-żmien, fosthom il-maġija, l-alkemija u l-alkemisti. Madankollu, dan il-ktieb innovattiv kellu jservi wkoll kemm biex l-awtur idawwar xi sold kif ukoll jispikka fost sħabu l-letterati. L-ewwel parti tat-teżi tikkonsisti f’ħarsa kritika lejn dak li nkiteb dwar ħajjet Juan Mamo, dwar il-fehmiet ewlenin tiegħu u dwar xogħlu, speċjalment fil-kuntest ta’ dak li jikteb f’Ġabra ta’ Sigrieti. Għal din il-parti, l-aktar li sibt utli kienu l-kotba ta' Oliver Friggieri Ġwann Mamo: Il-Kittieb tar-Riforma Soċjali u ta’ Francis Galea Juan Mamo: Ħajtu u Ħilietu u teżijiet li saru dwaru. Segwejt ukoll is-sensiela radjofonika L-Amerka ta’ Mamo u l-Konferenza Juann Mamo minn fuq Youtube li komplew iwessgħu l-għarfien tiegħi ta’ Mamo u l-kuntest storiku, soċjopolitiku u kulturali ta’ żmienu.