Il-metafora kunċettwali fil-Malti : analiżi ta' kliem mill-qasam tal-pjanti bil-korpus Malti

Abstract

F'dan l-istudju nanalizza kliem mill-qasam tal-pjanti. L-ewwel pass ikun li nara jekk kelma partikolari hix qed tintuża b'mod metaforiku jew b'mod letterali skont il-kuntest. L-interess ta' dan l-istudju hu b'mod speċjali f'dawk il-kuntesti li fihom hemm użu metaforiku. Meta fir-riżultati nsib kuntest metaforiku, nara x'tip ta' metafora qiegħda tiġi mħaddma u nanalizza bir-reqqa l-metafora kunċettwali. Dan nagħmlu billi noħroġ b'aktar metafori bi-istess kunċett mill-istess qasam, jiġifieri dak tal-pjanti. Dan l-istudju jipprova jara r-restrizzjonijiet tal-lingwa li jinħolqu f'moħħ il-kelliem meta juża kelma b'mod metaforiku, u hu għalhekk li l-istudju tal-metafora jissejjaħ studju konjittiv. Minħabba li għad m'hawnx studji fit-tul tal-metafora kunċettwali fil-Malti, ibbażajt ħafna mill-ħsieb u mir-riċerka tiegħi fuq l-istudji ta' George Lakoff u Mark Johnson, b'mod speċifiku l-istudju li beda kollox: 'Metaphors we live by'. Wara li nagħti ħarsa lejn il-letteratura fuq il-metafora kunċettwali u l-użi differenti li joffri l-MLRS, il-Korpus Malti, ngħaddi biex nirriċerka l-kelmiet, kuntest kuntest. FI-aħħar niġbor l-informazzjoni kollha u niddiskuti r-riżultati li nkun ksibt, u mit-tabelli u l-persentaġġi nara liema metafori kunċettwali joħorġu mill-analiżi. L-MLRS kien l-għodda prinċipali li bih stajt nagħmel ir-riċerka tiegħi.