Il-kriżi ta' l-identita fil-poeżija mis-snin sittin 'l hawn

Abstract

Is-snin sittin ġabu magħhom f’Malta moviment letterarju li kien effett dirett taż-żmien, mera tal-qagħda soċjali u politika. Il-poeta sar konxju tal-problemi soċjali u politiċi, fi żmien meta l-Indipendenza ġabet magħha speċi ta’ ewforija ġdida u fl-istess ħin sens ta’ dubju u inċertezza. Bil-miġja tal-Indipendenza politika għal Malta bilfors li kellha ssaltan dik l-atmosfera ta’ twelid ġdid, ta’ patrija żagħżugħa bl-ambizzjonijiet partikolari tagħha. L-identita spiritwali hi kriżi oħra li tidher sew fil-poeżija mis-sittinijiet ‘l hawn.