Aspetti lessikali u grammatikali fil-glossarju pirotekniku

Abstract

Il-piroteknika hija sengħa ħajja mħaddma minn pirotekniċi żgħażagħ u anzjani b’mod volontarju, biex wara ħafna sagrifiċċju jsarrfuha fi prodott jew xogħol tan-nar li jiddistingwina minn kull pajjiż ieħor. L-għan ta’ dan l-artiklu hu li nagħti ħarsa dettaljata lejn l-aspetti lessikali u grammatikali interessanti li nsibu fil-glossarju pirotekniku ta’ din is-sengħa fil-kumplessità tagħha. Il-glossarju huwa tip ta’ varjazzjoni lingwistika li mhuwiex assoċjat ma’ post ġeografiku imma ma’ gruppi ta’ nies li għandhom l-istess interessi jew ma’ ċirkostanzi ta’ użu partikolari bħalma huwa xogħol jew sengħa. Trudgill ifissru bħala “varjazzjonijiet lingwistiċi li huma marbuta mal-professjoni, okkupazzjonijiet u anke suġġetti”. Dan l-artiklu huwa mqassam f’seba’ taqsimiet: il-kliem kompost, l-għadd tan-nom, il-forom aġġettivali, il-proċessi metaforiċi, il-kliem onomatopejku, il-kliem partikolari għal dan il-glossarju, u t-termini li mhumiex reġistrati fid-dizzjunarju jew ma jingħatawx bit-tifsira assoċjata mal-logħob tan-nar.