Mużika Marjana fix-xogħlijiet ta’ Mro. Carmelo Pace (1906-1993) : f’għeluq il-25 sena minn mewtu

Abstract

Fil-ktieb tal-festa titulari ta’ dis-sena ktibtilkom artiklu ferm sabiħ bl-isem ta’ ‘Tislima lil Marija’ li jittratta l-Ave Maria (1941) tas-surmast Naxxari Ġużeppi Fenech (1917-2010). Għaldaqstant, għall-okkażjoni tal-festa tal-Madonna taċ-Ċintura, għażilt li nkompli nitratta das-suġġett billi nikteb dwar l-għadd imdaqqas ta’ mużika marjana li ħarġet mill-pinna tas-surmast prolifiku Malti, Carmelo Pace (1906-1993). Dan qed nagħmlu mhux biss fl-okkażjoni ta’ għeluq il-25 anniversarju minn mewtu, iżda wkoll biex insellem il-memorja tiegħu bħala għalliem tal-mużika li tiegħu jiena kont wieħed mill-ħafna u ħafna studenti li tħarrġu mingħandu. Għadni niftakar qisu lbieraħ indoqq klarinett sekond fil-kunċerti vokali u strumentali mtellgħin mill-Istitut Kulturali Malti taħt il-bakketta anzjana tiegħu ġewwa s-sala tal-ballu tal-lukanda Phoenicia, il-Furjana. Niftakar ukoll li meta tħabbret il-mewt tiegħu li ġrat fl-20 ta’ Mejju 1993 kont għadni student tar-raba’ sena fil-konservatorju superjuri ta’ Lyon, Franza. U dlonk ħsiebi ttajjar għal dak iż-żmien meta kont nidderieġi xi xogħol orkestrali tiegħu mal-orkestra tal-Istitut Kattoliku , fosthom il-famuża Maltesina (1931).