L-Imqabbi u l-ġenerazzjonijiet differenti : studju soċjolinġwistiku

Abstract

F’din it-teżina se nanalizza l-varjetà Mqabbija. L-għan tiegħi hu li nara kemm id-djalett Imqabbi għadu b’saħħtu f’dan ir-raħal, bit-tama li fil-futur dan id-djalett ma jintilifx. Għalhekk ħadt żewġ ġenerazzjonijiet b’etajiet differenti minn xulxin. Il-ġenerazzjoni anzjana se turini kif qiegħed jintuża d-djalett bħalissa fost din il-ġenerazzjoni. Filwaqt li l-ġenerazzjoni żagħżugħa se turini l-iżvilupp ta’ din il-varjetà u eventwalment il-futur tagħha. Għażilt dawn iż-żewġ ġenerazzjonijiet biex noħloq paragun bejniethom. Biex niġbor l-informazzjoni ridt insib tema li tinvolvi lill-parteċipant emozzjonalment sabiex l-lingwaġġ tiegħu jkun iżjed naturali. Għalhekk ħsibt li l-festa tar-raħal hija l-aktar tema b’saħħitha biex toħroġ id-djalett. Għal din ir-riċerka qgħadt attenta li nkun speċifika fl-għażla minħabba ż-żmien limitat. Il-parteċipanti għażilthom irġiel biss għaliex ridt ninnewtralizza l varjabbli tas-sess. Għażilt informanti rġiel għaliex dawn jieħdu iżjed sehem fil-festa min-nisa. Dan għamiltu biex niffoka fuq varjabbli soċjolingwistiku wieħed għaliex jekk inżid il varjabbli, l-istudju kien jitwal wisq.