It-tagħlim tal-etika permezz tal-kotba bl-istampi bil-Malti

Abstract

Din id-dissertazzjoni tiffoka fuq l-użu tal-kotba bl-istampi bil-Malti, u kif dawn jistgħu jintużaw biex jagħmlu t-tagħlim tal-Etika aktar interessanti u interattiv. Permezz tal-pakkett tar-riżorsi li ħloqt, din id-dissertazzjoni se tagħti l-possibiltà li jkun hawn aktar għarfien fuq il-kotba bl istampi bil-Malti, u aktar kuxjenza fuq is-suġġett tal-Etika, u l-importanza li għandu dan is suġġett għall-istudenti Maltin u barranin. Mill-analiżi ta’ din id-dissertazzjoni kien evidenti li l-għalliema mhux kollha huma konxji tal kotba bl-istampi li jeżistu bil-Malti u għalkemm jużaw il-kotba bl-istampi, ma jagħmlux użu minn kotba bl-istampi bil-Malti, u oħrajn maqlubin għall-Malti. Għalhekk minbarra li tgħallimt mingħand l-għalliema, u l-opinjonijiet differenti tagħhom, l-għalliema tgħallmu fuq il-kotba bl istampi differenti li hawn u ħadu ideat ta’ kif tista’ tiġi mgħallma l-Etika, b’mod aktar differenti u interattiv. Din id-dissertazzjoni tista’ tintuża mill-għalliema li ma jgħallmux biss l-Etika, u għalhekk jistgħu jieħdu xi ideat mill-attivitajiet li ħloqt. Dawn se jservu ta’ benefiċċju għall istudenti li qed jitgħallmu kwalunkwe suġġett, billi jiġu addattati mill-għalliema, skont is-suġġett u l-abbiltà tal-istudenti.