Il-Kunsill Civiku ta' Ghawdex : esperjenza tal-imghoddi jew mudell ghall-gejjieni?

Abstract

L-Għawdxin u l-Maltin jedhew bit-tifkiriet. Ma tgħaddix ġimgħa mingħajr tifkira ta’ xi ċentinarju mit-twaqqif ta’ xi parroċċa, inkella festa f’għeluq il-ħamsin sena mill-inkurunazzjoni ta’ xbieha qaddisa, inkella lejla mużiko-letterarja f’ġieħ xi surmast li waqqaf banda ħamsa u sebgħin sena ilu, u l-bqija. Dawra mat-toroq tal-Gżejjer twassal minn niċċa għal oħra, minn mafkar għal irħama, donnok għaddej minn via sagra li tfakkar qaddisin, benefatturi u dawk li mietu b’diżgrazzja tul medda ta’ sekli. Ħadd ma għandu jistgħaġeb b’dan l-akkaniżmu għattifkiriet, għax l-Għawdxin u l-Maltin poplu ċkejken bi storja twila. Ilmonumenti, l-irħamiet, l-istejjer li nirrakkontaw minn nisel għal nisel, dawn kollha jfakkru il-ġens imnejn ġej; ifissru min hu llum; u kultant, jekk jgħarbilhom sewwa, jgħinuna nagħrfu l-isfidi tal-ġejjieni. Għaddejjin minn żmien ta’ bidliet mgħaġġlin, wiesgħin u mill-qiegħ, qalb il-fdalijiet ħajjin u mejtin ta’ storja li ilha tintiseġ għal madwar sebat elef sena. X’jiswew dawn il-fdalijiet, dawn it-tifkiriet fi żmien daqstant imqalleb, daqstant ġdid, daqstant lest li jiċħad lill-imgħoddi? Din ilmistoqsija qiegħda tqum f’kull qasam tal-ħajja ta’ ġensna, u t-tweġibiet aktarx m’humiex ċari. Qajjimha min sejjaħ din il-konferenza biex titfakkar il-ħamsin sena mit-twaqqif tal-Kunsill Ċiviku ta’ Għawdex u staqsa jekk kienx il-Kunsill Ċiviku esperjenza tal-imgħoddi inkella mudell għall-ġejjieni.