Minn skola għal oħra

Abstract

It-tagħlim tat-tfal fiż-Żejtun ra l-bidu tiegħu fl-ewwel nofs tas-seklu dsatax bil-ħidma ħabrieka tal-kjeriku Dun Alwiġ Camilleri (1774- 1849), u jidher li fl-1819 dan it-tagħlim beda jsir fil-meżżanin li kien hemm wara l-Knisja tal-Ispirtu s-Santu. Wara xi żmien inħass il-bżonn ta' aktar wisa' minħabba l-ammont ta' tfal dejjem jiżdied, u fl-istess lok inbniet dar li għadha hemm sa llum. Din bdiet isservi bħala skola, u fl-1838 l-stess dar għaddiet għand il-Gvern li ried jieħu t-tagħlim taħt idejh. Dan il-bini llum huwa magħruf bħala Dar San Ġużepp u fih insibu l-Komunita' tas-Sorijiet Ulied il-Qalb ta' Gesu’. Fil-bidu tas-seklu għoxrin inħass il-bżonn ta' skola tal-Gvern akbar u ġie magħżul sit ftit metri l-bogħod mil-iskola li semmejna aktar qabel u ftit għexieren ta' metri l-bogħod mill-knisja parrokkjali. ld-disinn ta' din l-iskola l-ġdida sar mill-Perit Ġuże' Pace u proprju fil-11 ta’ Ġunju 2008 l-iskola primarja qed tgħalaq mitt sena minn meta ġiet imbierka u miftuħa.