Ma’ kull qatra semm li sqejtna mal-mejda : il-piż tal-familja fil-poeżija ta’ Antoine Cassar

Abstract

Dan l-istudju jipprovdi analiżi tal-ġabra poetika 'Erbgħin Jum' ta’ Antoine Cassar, u jiffoka primarjament fuq it-tema tal-familja u l-effett ta’ din l-istituzzjoni fuq il-poeta. L-istudju jsir permezz ta’ analiżi letterarja megħjuna minn teoriji soċjoloġiċi u psikanalitiċi li permezz tagħhom tikxef uħud mis-saffi moħbija taħt il-poetika ta’ din il-ġabra. Waqt li l-għan prinċipali huwa letterarju, din it-teżina tinterpreta l-letterarjetà ta’ din il-ġabra permezz ta’ għejun oħra li jmorru lil hinn mil-letteratura iżda li jgħinu jispjegaw aħjar xi jwassal lill-poeta jagħmel dan il-vjaġġ. L-istudju jmur lura lejn l-istorja tal-familja miż-Żminijiet Nofsana ’l hawn, jirriċerka lmod kif il-familja ġiet trattata u ppreżentata fil-letteratura Maltija ta’ epoki differenti, b’ħarsa lejn l-iskola konfessjonali li din il-poeżija tappartjeni għaliha. L-analiżi tistħarreġ il-vjolenza domestika, ir-relazzjoni li tfalli bħala riżultati tat-trawmi psikoloġiċi tat-tfulija, u t-tentattiv tal-maħfra tal-poeta lill-missier li hu l-aġent tal-vjolenza mġarrba mill-poeta. Mill-analiżi joħroġ li Cassar konsistentement jisfida lill-istituzzjoni tal-familja, u b’mod sħiħ juri effetti katastrofiċi ta’ familja disfunzjonali. Cassar jikxef dan kollu permezz ta’ tberriħ ta’ esperjenza profondament personali.