It-tema tal-vjaġġ fil-poeżija ta' Mario Azzopardi

Abstract

L-ideoloġija ġenerali ta' Azzopardi, qabel ma nidħlu fid-dettal fil-mixja poetika tiegħu fis-sittinijiet, hija tal-poeta li jrid jesplora l-kruha tal-ħajja biex ikun jista' jeliminaha. Ladarba dak iż-żmien ikun ta' vjolenza, hekk ukoll il-poeżija għandha tkun vjolenti. Il-poeżija tilħaq il-qofol tagħha meta ssir forma ta' protesta li tirrifletti l-uġigħ tal-poplu. Azzopardi jemmen li kull kreazzjoni artistika hija att politiku. Il-kreattivita' letterarja għandha tkun proċess kontinwu favur il-progress ta' soċjeta' partikolari. Il-letteratura trid tirrifletti l-involviment tal-bniedem fis-soċjeta', biex b'hekk tkun tista' tirrifletti l-kuxjenza kollettiva u l-kreattivita' b'tali mod li tkun tista' tiġi wżata bħala għodda rivoluzzjonarja. Il-letteratura m'għandhiex tkun monopolizzata mill-akkademiċi. Il-kultura personali: li tkun konxju ta' dak li qiegħed jiġri fis-soċjeta' preżenti, tagħti sura lill-kultura soċjali. Il-bniedem mhux qiegħed jiġi ppreżentat bir-realta' anzi hu estran minnha. Azzopardi fil-kitba kreattiva tiegħu jmur 'il bogħod mill-elitiżmu akkademiku ta' żmienu, li jista' jwassal għat-tnaqqis tal-popolarita' tal-poeżija.