Poeżiji inediti ta' Ludovik Mifsud Tommasi u s-siwi lingwistiku tagħhom

Abstract

Xi drabi personaġġi li ma jkunux daqshekk magħrufa jiġu minsija għad li jkunu taw kontribut kbir lis-soċjeta'. Dawn il-personaġġi jixraqilhom li jkunu rikonoxxuti għall-ħidma kbira tagħhom u jkun sabiħ meta l-poplu jqum fuq saqajh u japprezza u jxandar il-ħidma tagħhom. Għaldaqstant wieħed mill-għanijiet tiegħi f'dan ix-xogħol, hu li nkompli nagħti tagħrif ieħor dwar il-ħajja ta' Ludovik Mifsud Tommasi (LMT), personaġġ li ħadem bis-sħiħ biex l-ilsien Malti jiġi apprezzat. Apparti minn hekk, xtaqt inkun naf u nitgħallem aktar dwar dan il-bniedem li sa ma qabel bdejt dan l-istudju ftit li xejn kont naf dwaru. Għan ieħor ta' dan ix-xogħol ċkejken hu li nagħti importanza lill-element lingwistiku fil-kitba ta' LMT. Infatti meta t-tutur tiegħi, is-sur Olvin Vella, qalli bil-proposta li nittraskrivi xi xogħlijiet ta' dan il-personaġġ, laqtitni minnufih u dħalt għaliha bi sfida. Dan għamiltu biex il-kitbiet ta' LMT li qatt ma ġew ippubblikati jkunu aktar aċċessibbli għall-pubbliku. Kif jixhed it-titlu ta' dan ix-xogħol, ser nagħti l-aktar importanza lil xi xogħlijiet b'forma poetika li għadhom qatt ma ġew editjati. Għalhekk il-kitba tiegħi hi maqsuma f'erba' taqsimiet ewlenin.