Nisa nsara li ħallew il-marka tagħhom fl-ewwel sekli tal-Knisja

Abstract

Fil-Vanġeli nsibu referenza għal numru ta’ nisa li influwenzaw mhux biss lin-nies ta’ żmienhom, imma li għadhom jinfluwenzaw il-Kristjaneżmu sal-lum: is-Samaritana, Marija Madalena, u Marija omm Ġesù huma biss xi eżempji. Ġesù ma kienx jiddejjaq jitkellem man-nisa, bosta segwaċi tiegħu kienu nisa, u l-ministeru tiegħu kien iffinanzjat minn nisa li kienu tat-tajjeb. Skont l-Atti tal-Appostli, in-nisa kienu fost l-iktar dixxiplli entużjasti. Biżżejjed insemmu lil Lidja, l-ewwel mara Ewropea kkonvertita minn Pawlu (Atti 16:11-15). Għandna wkoll lil Prixxilla (Priscilla, imsemmija f’Atti 18), li għallmet lil Apollo, raġel li kkonverta (Atti 18:24-28). F’dan iż-żmien għandna wkoll evidenza ta’ nisa djakni li kienu qegħdin jgħinu lill-komunità. Ma jistax jonqos li dawn in-nisa, u oħrajn bħalhom, ħallew il-marka tagħhom mhux biss fi żmienhom, imma saħansitra llum.