Il-kotba ambaxxaturi għal Malta

Abstract

Il-ktieb ilu preżenti fil-ħajja tal-bniedem għal sekli sħaħ. Matul iż-żmien ħafna apprezzawh, imma ħafna oħrajn maqdruh; kien hemm dawk li beżgħu minnu, u kien hemm oħrajn li għożżewh. Kien u għadu mezz ta’ kontroversja, ta’ tagħlim u edukazzjoni, ta’ propaganda u influwenza, ta’ mogħdija taż-żmien u ta’ timriħ fil-fantasija. Il-ktieb hu l-akbar ħabib għal dawk li jqisuh bħala teżor, u mistmell minn dawk li jħossuh ta’ piż u obbligu forsi għax iridu jaqrawh jew jistudjawh bilfors. Jingħad x’jingħad dwar il-ktieb, hu fatt innegabbli li meta tkun trid tifhem u tiskopri, il-ktieb hu wieħed mill-mezzi l-aktar effiċjenti biex taqta’ l-kurżità jew issaħħaħ opinjoni.