Il-Mostin - bejn fidi u storja

Abstract

Laqtiet u aspetti mill-istorja tal-Mosta u tal-Mostin inkitbu ħafna, u minn diversi riċerkaturi, studjużi, u awturi oħra, imma l-istorja tal-Mostin u l-manifestazzjoni tal-fidi tagħhom qatt ma nġabret f ’volum wieħed. Nafu li mill-aktar żminijiet ’il bogħod, it-twemmin reliġjuż u l-ħajja ta’ kuljum tal-bnedmin kienu prattikament ħaġa waħda, għax il-bnedmin kienu jassoċjaw kulma jiġri – jew ma jiġrix – ma’ xi setgħa aqwa minnhom li huma kienu jemmnu li teżisti, avolja ma setgħux jarawha jew imissuha. Kienu jemmnu b’fidi soda li xi ħadd jew xi ħaġa kienet tikkontrolla u tmexxilhom ħajjithom fuq din l-art. U din il-qawwa divina kienet qed itella’ x-xemx; tibgħat ix-xita; tkabbar il-ward, il-frott u l-ħxejjex; u tiddeċiedi dwar il-ħajja u l-mewt ta’ kull wieħed u waħda minnhom. Kienu jemmnu wkoll minn dejjem li wara l-ħajja fid-dinja kien hemm xi forma ta’ ħajja oħra; x’imkien. Fi kliem ieħor il-bniedem kien marbut mat-twemmin u l-fidi fis-sopranatural. U dan minn żmien preistoriku.