Il-kliem ta’ nisel Ingliż fil-Malti

Abstract

Mill-esperjenza li għandi fl-industrija għal dawn l-aħħar tnax-il sena ngħid bla tlaqliq li l-mod ta' kif għandu jinkiteb il-kliem Ingliż fit-testi bil-Malti jippreżenta l-akbar diffikultà li qegħdin jaffaċċjaw dawk li jiktbu r-reklami, l-istqarrijiet għall-istampa u kull xorta ta' materjal promozzjonali. Ħafna drabi t-termini tan-negozju li jiġġeneraw il-bejgħ u x-xiri fis-suq ma jistriħux fuq il-pilastru tal-Malti semitiku, imma jagħmlu użu minn ħemel kliem barrani, b'mod partikulari l-Ingliż, biex iwasslu messaġġi kummerċjali. Illum ħadd ma jirreklama l-bejgħ ta' xi kenur·, rampil jew satal (sakemm ma jkunx xi antikwarju jew xi wieħed jinnegozja fid-djar antiki), iżda kukers, friġis, televixins, giżers, ħiters, mowbajls, kompjuters, tajers, dvds, bwiez, ċips tal-borża, trakkijiet tal-Ġappun (jew tal-Ġapan) u x'naf jien. L-interessi ta' dawn it-talin imorru lil hinn mill-identità u t-tħaddim dinjituż ta' l-ilsien nazzjonali - il-ħsieb ewlieni tagħhom huwa kif se jħajru lill-qarrejja, lit-telespettaturi u lis-semmiegħa jikkunsmaw il-prodotti u s-servizzi tagħhom u jħallu lill-bqija tal-prodotti tal-kompetituri fuq l-ixkaffa. F'dan il-kamp, il-lingwa għandha rwol purament funzjonarju, imma lkoll kemm aħna jkollna nammettu li l-Malti fin-negozju, fuq l-internet u fuq il-bilbords qiegħed iħalli impatt fuq il-poplu ferm aktar minn xi rumanz jew poeżija mirquma bl-idjoma 'safja' semitika.