It-tfassil, it-twettiq u l-evalwazzjoni tal-politika

Abstract

Il-Malti, bħat-Taljan, ma jiddistingwix kif jagħmel l-Ingliż bejn politics u policy. Tal-ewwel, essenzjalment, tfisser l-attivitajiet relatati mat-teħid ta’ deċiżjonijiet fi gruppi u li għandhom x’jaqsmu mal-mod ta’ kif jitmexxa dak il-grupp u r-riżorsi tiegħu. Għalhekk il-politika tiffoka fuq ir-relazzjonijiet ta’ poter bejn dawn ix-xirkiet u kif xirka taffettwa lill-oħra inkluż, iżda mhux limitat, it-taqtigħa għall-poter bejn il-partiti. Dan kollu, fl-istudju tax-xjenza politika, huwa diskuss fuq livell lokali, nazzjonali jew supranazzjonali. It-tieni, policy, tirreferi għad-direzzjoni li tiggwida d-deċiżjonijiet u l-azzjonijiet ta’ dawn il-gruppi. Meta nitkellmu dwar public policy inkunu qegħdin nirreferu għal dawk id-deċiżjonijiet, azzjonijiet jew nuqqas ta’ deċiżjonijiet u azzjonijiet tal-Gvern. Dawn jinvolvi proċessi li jinkludu diversi stadji fit-tfassil, l-approvazzjoni tal-pjanijiet, l-implimentazzjoni u l-evalwazzjoni tal-istrateġiji tal-Gvern. It-termini politics u policy it-tnejn li huma jitfgħu dawl fuq it-tip ta’ governanza li tintuża biex jitmexxa pajjiż. L-ilsien Malti, bħal dak Taljan, juża l-kelma ‘politika’ fiż-żewġ każijiet. Il-plural ta’ politika fil-każ ta’ policy huwa politiki. Biex nirriflettu fuq il-mod ta’ kif il-Gvern jagħmel il-politika tiegħu, tkellimt ma’ Dott. Marie Louise Mangion, akkademiku fid-Dipartiment tal-Politika Pubblika fi ħdan l-Università ta’ Malta. Minbarra karriera attiva fuq il-kampus, Mangion tgawdi minn snin ta’ esperjenza fir-riċerka, it-tfassil u l-implimentazzjoni tal-politika, partikolarment fis-settur turistiku u ambjentali, kif ukoll fil-qasam tal-affarijiet Ewropej u fondi Ewropej.