Brajmla ruxxana u għasfur kaħlani : il-mediterranjeta f'mappa tal-Mediterran ta' Antoine Cassar

Abstract

Antoine Cassar jirreferi għall-Mediterran bħala "the comfort of a womb, a fertile basin, the cradle of civilisation" (Cassar, 'mhuxfisimna'), ideat li jieħdu sura simbolika fil-poeżija 'Mappa tal-Mediterran'. Kif jixhed il-vers "Il-Baħar tan-Nofs, skont imnejn tħares" (Mappa 4), il-bidu ta' dan ix-xogħol jitlaq milli mmaġinazzjoni tal-kittieb li ma jirristrinġix ruħu għall-mod konvenzjonali ta' kif inhi mpinġija l-mappa, u minflok jaraha minn perspettivi differenti. Hu u jdawwar il-mappa biex jaraha minn angoli differenti, Cassar jimmaġina l-forma ta' dan ir-reġjun bħala fetu, dgħajsa, katavru, u għasfur, xbihat f'perspettivi differenti u xi drabi kuntrastanti, miġbura f'baħar wieħed (Cassar,'mhux fisimna'). F'dan l-istudju se niffoka fuq xi aspetti li jintisġu flimkien biex isawru din il-poeżija, fosthom il-ħxejjex, il-pjanti, l-annimali, in-nies u dak li jgħaqqadhom, il-miti, u r-reliġjon.