L-ghana : bejn il-folklor u l-habi

Abstract

Din il-Konferenza tittratta l-Identita` Kulturali Maltija u l-kontribuzzjoni tiegħi ser tkun waħda qasira u mnaqqsa. Madankollu nittama li jirnexxili nqiegħed għadd ta' mistoqsijiet dwar l-identita jew l-identitajiet kulturali Maltin, li forsi jaslu biex iqanqlu d-diskussjoni. Jiena antropologu soċjali u x-xogħol tiegħi għamiltu l-aktar barra minn Malta (fil-Greċja, f'Ċipru u fit-Tuneżija), u allura l-osservazzjonijiet li nagħmel fihom element doppjament barrani. L-ewwelnett peress li l-ħidma antropoloġika fiha nnifisha tinħtieġ li dak li jkun jersaq lejn fenomeni kulturali bħal dawn minn barra, u b'ċertu empiriċiżmu naive (innoċenti) jistaqsi mistoqsijiet l-aktar bażiċi. U t-tieninett peress li l-interessi professjonali tiegħi s'issa kienu kkonċentrati fuq inħawi oħra tal-Mediterran. Madankollu jiena· Malti u nittama li bi strateġija nilgħab preċiżament b'dawn il-kategoriji tal-"ġewwa" u l-''barra'', biex nimponi l-mistoqsijiet minn "barra" filwaqt li nipprova nweġibhom minn "ġewwa", bħala Malti.