Storja qasira tal-antoloġija letterarja fis-sistema edukattiva lokali

Abstract

F’din il-kitba, se nagħti ħarsa qasira lejn kif żviluppa f’Malta, b’enfażi fuq is-sistema edukattiva, il-kunċett ta’ antoloġija. Oliver Friggieri ddeskriva l-antoloġija bħala “ġabra ta’ proża jew poeżija, jew tagħhom flimkien magħmula mill-awtur innifsu jew minn ħaddieħor, aktarx imqassma skont xejriet u forom differenti, ngħidu aħna, skont temi, epoki, stili u l-bqija.” Friggieri argumenta li l-antoloġija ssir l-iktar biex tintuża f’ambjent ta’ tagħlim. Mhux darba jew tnejn li għaqdiet letterarji bħall-Għaqda Letterarja Maltija, l-Għaqda Poeti Maltin u diversi oħrajn irrikorrew għall antoloġija biex jippubblikaw xogħol il-membri tagħhom anki jekk din tagħhom qatt ma daħlet fl-ebda sillabu skolastiku jew universitarju. Bosta drabi dawn l-antoloġiji kienu jkunu ssussidjati mill-awturi nfushom billi jħallsu rata fissa għal kull paġna li jieħdu.