L-importanza tal-litteriżmi soċjali fil-ħajja u fl-edukazzjoni b'referenza wkoll għal Malta

Abstract

Dan l-istudju qiegħed jittratta l-litteriżmi soċjali fit-tagħlim. Qabel ma bdejt ninvestiga dan is-suġġett, kont nemmen li fil-qasam tat-tagħlim tal-lingwi f'pajjiżna ninsabu fi kriżi għax il-metodoloġija fit-tagħlim taż-żewġ lingwi uffiċjali kienet żbaljata. Biss meta bdejt nidħol fil-qalba ta' x'kitbu studjużi bħal S.B. Heath, B. Street, D. Barton, u oħrajn li kitbu f'dan l-aħħar kwart ta' seklu rrealizzajt li qabel kull pjan ta' xi metodoloġija ġdida kien jenħtieġ li anki f'pajjiżna jibda studju dwar il-litteriżmi soċjali. X'inhuma l-litteriżmi soċjali? Il-litteriżmu għandu x'jaqsam ma' diversi modi differenti ta' tagħrif ta' l-esperjenza umana, dak li Gee sejjaħ 'epistemoloġiji soċjali differenti'. Kienu ħafna l-istudjużi li permezz ta' studji etnografiċi li għamlu fost komunitajiet partikulari, urew li hu impossibbli li tifhem it-tifsira sħiħa tal-modi ta' kif tuża il-lingwa biex tikkomunika mingħajr ma tistudja l-ambjenti soċjokulturali tal-komunitajiet li qed tinvestiga. [silta mill-artiklu]