L-ewwel statwa proċessjonali fil-Parrocca tal-Mosta

Abstract

L-ewwel statwa li bdiet toħroġ f'purċissjoni fil-Parroċċa tal-Mosta, kienet dik tal-Madonna tar-Rużarju li saret għall-knisja parrokkjali l-qadima. X' aktarx li kienet ġiet ordnata lejn tmiem il-parrokat twil ta' kważi 45 sena talKappillan Mosti Dun Lawrenz Abela li miet fit-28 ta' Frar 1742. Laħaq warajh Kappillan Mosti ieħor, Dun Ġwann Anġlu Sammut, li ħa l-pussess fl-20 t' April 1742, u kien fi żmienu li għall-ewwel darba dehret fil-parroċċa tagħna din l-istatwa tal-Madonna li setgħet iżżanżnet, għalkemm dan ma nafuhx, fil-Festa tal-Madonna tar-Rużarju ta' dik is-sena stess. Din hija statwa skolpita b'sengħa. fl-injam fl -istil barokk tardiv. Sa ftit xhur ilu, ftit li xejn konna nafu dwar l-oriġini tagħha, għaliex fl -arkivju tal-Knisja Arċipretali tagħna qatt ma nstab xi dokument dwar meta saret u min ħadimha . Fost l-oħrajn niltaqgħu ma' dokument lijgħidilna li f'Mejju ta' l-1766 l-istatwa żgur li kienet teżisti , għax kienet saritilha speċi ta' kaxxa għal quddiemha fejn kienu jintefgħu l-offerti tal-flus u dak kollu.