Sptar tat-Tieni Gwerra Dinjija ġo Xelter fil-Furjana

Abstract

Kien biss fis-sena 1941 li nħass il-bżonn urġenti li taħt l-Isptar Ċentrali, fil-Furjana, l-uniku wieħed fejn kienet issir kirurġija, jitħaffer xelter sptar għaliex l-Italja taħt Benito Mussolini, kienet daħlet alleata tal-Ġermanja (Axis Power). Fl-Ewwel Gwerra Dinjija, il-gżejjer tagħna ma batew xejn attakki mill-ajru u għalhekk ma kienx hemm esperjenza ta’ kemm huma qawwija l-bombi li jitfgħu l-ajruplani talgħadu. Imma fis-sena 1939 l-istorja kienet wisq differenti għax l-ajruplani kienu qed jinbnew b'saħħithom ħafna u kienu kapaċi jġorru bombi qawwija tant li jwaqqgħu l-bini. B’urġenza kbira ħafna ħaddiema tal-Gvern ġew ordnati jħaffru xelter kbir taħt l-Isptar Ċentrali ħalli waqt attakk mill-ajru jitniżżlu fih il-pazjenti kif ukoll li hemm isfel ikunu jistgħu jsiru operazzjonijiet u l-ommijiet iwelldu t-tfal kemm naturali u kemm b'operazzjoni ċesarja. Għal dan il-għan twaqqaf teatru tal-operazzjoni komplut bi kmamar għall-ħasil tal-idejn u kamra għall-isterilizzazzjoni tal-ħwejjeġ u apparat kirurġiku. Ħaġa oħra li għamlu fix-xelter kien apparat għat-teħid u żvilupp tal-X Rays. Kamra miksija folji taċ-ċomb twaqqfet ħdejn is-sala operatorja.