L-editorjal

Abstract

Is-sena 2020 kellha tkun imfakkra mill-Akkademja tal-Malti bħala s-sena taċ-ċentinarju mit-twaqqif tagħha, imma bla dubju aktar se nibqgħu niftakruha bħala s-sena tal-imxija tal-Covid -19 – virus li ġab id-dinja għarkupptejha. Fl-ewwel xhur tas-sena d-dinja waqfet ħesrem, ir-ritmu qabbieżi tal-ħajja mgħaġġla li konna qed ngħixu nbidel mil-lejl għan-nhar f’ritmu ta’ marċ funebri kawża ta’ virus qerriedi li ħasad u għadu jaħsad il-ħajja ta’ mijiet ta’ eluf ta’ persuni. Tħawwadna lkoll għax ma konniex nafu x’qed jiġri u wisq anqas x’se jiġri. Fi żmien qasir għalaqna l-iskejjel u l-ajruport, bdejna naħdmu u nitgħallmu mid-dar, negozju wara l-ieħor bdew jagħlqu l-bibien tagħhom u kienu bosta li tilfu xogħolhom. Bdejna naħsbu b’mod differenti, nirraġunaw b’mod differenti... ngħixu b’mod differenti.