Proża popolari Maltija kontra l-Komuniżmu

Abstract

“Proża Popolari Maltija kontra l-Komuniżmu” hija ktiba ta’ Sergio Grech li tiffoka fuq perjodu politiku ta’ pajjiżna u kif dan ġie rifless fil-letteratura ta’ żmienu. Id-deċiżjoni tal-Perit Mintoff li jissieħeb fl-AAPSO u s-Socialist International kienet biżżejjed biex il-forzi Kattoliċi Maltin jirritaljaw u jpoġġu l-akkuża li Malta b’Mintoff fil-poter kienet se ssir ċentru ħaj u vibranti ta’ Komuniżmu. Inzerta li f’Kuba, Fidel Castro kien ħa l-poter f’idejh u mażżmien kien sar mexxej assolut fejn il-Knisja Kattolika ntefgħet fis-sagristija u tnaqqsitilha s-saħħa tagħha. Il-‘ħbiberiji Russi’ tal-Perit Mintoff ma għenux u l-ilma kompla jiddardar. Il-forzi reazzjonarji mill-ewwel użaw l-istampa għall-kampanja tagħhom. Minn hemm jibda moviment b’saħħtu ta’ proża f’sens miftuħ ta’ letteratura anti-Komunista b’mod speċjali fil-gazzetti u sorsi oħrajn. Skont Grech il-biża’ mill-Komuniżmu ma kienx ġdid f’Malta u anki dakinhar intużat l-istampa bħala parti mill-kampanja reazzjonarja.