EMPACT : qafas Ewropew fil-ġlieda kontra l-kriminalità organizzata

Abstract

Waħda mill-aktar funzjonijiet importanti fejn jidħol ix-xogħol tal-Pulizija, hi li tiżdied il-kooperazzjoni pulizjeska anke barra minn xtutna. Għal għexieren ta’ snin, il-Pulizija Maltija għamlet dak kollu possibbli sabiex tindirizza l-kriminalità ma’ sħabha. Din bdiet meta Malta saret membru tal-Interpol fil-bidu tas-snin sebgħin u wara, meta fil-bidu tas-snin elfejn, hekk kif sirna parti mill-Unjoni Ewropea, sirna wkoll membri tal-Europol. Matul dan iż-żmien, il-kuntatti bilaterali ma’ servizzi ta’ pulizija barranin komplew jiżdiedu għaliex minn dejjem fehemna li prattikament din hija s-sinsla għall-riżultat tajjeb u b’saħħtu fejn tidħol il-kooperazzjoni. Fil-qosor, EMPACT tfisser European Multi-disciplinary Platform Against Criminal Threats. Din hija inizzjattiva multi-dixxiplinarja Ewropea msewsa fuq intelligence u evidenza. L-iskop hu li tirrispondi għat-theddid serju tal-kriminalità li qed tiffaċċja l-Unjoni Ewropea. F'dan l-artiklu hija lista ta’ prijoritajiet, il-miri u d-dettalji tal-parteċipanti mill-Korp tal-Pulizija u mid-Dwana ta’ Malta, għas-snin 2022 - 2025, imqassma skont in-natura tar-reat.