Iċ-ċimiterju ta' Ħal-Luqa

Abstract

Iċ-ċimiterju ta' Ħal-Luqa li llum jinsab fi triq l-Gudja jaf il-bidu tiegħu fis-sena 1676, meta faqqgħet il-pesta. Fi żmien il-Kappillan Dun Lorenzo Frendo Rossi (1864-1877), Mikelanġ Sapiano, il-magħruf arluġġar kien prokuratur tal-erwieħ tal-purgatorju għalhekk iċ-ċimiterji kollha tar-raħal kienu f'idejh. F'dan iż-żmien iċ-ċimiterju kien xi erba' piedi 'l fuq mit-triq u kien qisu bħall-ġnien żgħir imdawwar b'erbgħa ħitan u bieb tal-injam. Sa dan iż-żmien ma kien għad hawn l-ebda sinjal li jindika li kien ċimiterju lanqas devozzjoni lejn dawn l-erwieħ li mietu bil-pesta, ma kien fadal. Meta nbidlet l-istatwa tad-Duluri l-qadima tal-Ġimgħa l-Kbira fil-Knisja Parrokkjali, Mikelanġ Sapiano ġieh il-ħsieb li joħodha f' dan iċ-ċimiterju u jibnilha niċċa mal-faċċata biex ipoġġiha fiha b'hekk ikun jindika li f'dan il-post hemm xi ħaġa qaddisa u tnissel ċerta devozzjoni min-nies li jgħaddu minn hemm. Din l-istatwa li kienet magħrufa bħala d-duluri tal-erwieħ baqgħet hemm sal-1923 meta inbidlet għal statwa bi Kristu mejjet f' ħoġorha. Meta fl-1933 l-gvernatur ta permess biex iċ-ċimiterju jitkabbar u jinqata' darba għal-dejjem id-dfin fil-knijsa din tneħħiet u ma hemm l-ebda informazzjoni dwar x'sar minn din l-istatwa.