Il-mara tal-Apokalissi il-Madonna fl-aħħar ktieb tal-Bibbja

Abstract

Il-kelma ‘Apokalissi’ ġejja mill-Grieg apo li tfisser ‘quddiem’ u kalupto li tfisser ‘xi ħaġa moħbija’. Huwa il-ktieb tar-Rivelazzjonijiet (mil-Latin: revelare). Għalhekk il-ktieb jittratta dwar rivelazzjoni ta’ xi ħaġa. Dan l-aħħar ktieb tal-Bibbja miktub minn San Ġwann l-Evaġelista huwa ktieb ta’ valur teoloġiku kbir, b’kunċetti teoloġiċi u viżjonijiet dwar dak li ġej u dak preżenti. Kemm San Irinew ta’ Lyons fis-sena 180 A.D., San Ġustinu (165 A.D.), Klement ta’ Lixandra (215 A.D.), u Origene jiktbu li Ġwanni l-appostlu huwa l-awtur tal-ktieb. Il-ġeneru letterarju tal-ktieb hija l-apokalittika u għalhekk tagħmel minn dan il-ktieb bħala wieħed profetiku fil-Ġdid Testment. Bħala apokalittika fl-Antik Testment insibu l-Ktieb ta’ Danjel, Isaija, Ġoel, Zakkarija u Eżekjel. Wara l-era bibblika nkitbu diversi kitbiet apokalittiċi. Temi ewlenin f ’din il-kitba huma l-affarijiet tat-tmiem id-dinja. Hawnhekk jidħol simboliżmu qawwi, kożmiku, terjomorfiku dwar l-annimali u dak aritmetiku. Fl-Apokalissi ta’ San Ġwann naraw l-idea ċentrali ta’ Kristu l-Pantokrator li jmexxi lid-dinja u liż-żmien.