L-Għar-knisja tan-Natività f’betleħem u l-għerien annessi

Abstract

Il-Bażilika tan-Natività f ’Betleħem hi wieħed mill-aktar santwarji important tal-Art Imqaddsa, mhux biss għall-misteru kbir li tfakkar, it-Twelid ta’ Ġesù, imma wkoll għall-antikità tagħha. Flimkien mal-Knisja ta’ Santa Katerina fis-Sinaj, il-Bażilika tan-Natività hi l-unika knisja Biżantina fl-Art Imqaddsa li baqgħet wieqfa intatta mis-seklu 6 sal-lum. L-istorja twila u mqallba ta’ dan is-Santwarju mhijiex l-iskop ewlieni ta’ din il-kitba, li se tieqaf pjuttost fuq l-Għar-Knisja tan-Natività, il-qalba tal-istess knisja. Imma nagħtu biss ħarsa ħafifa lejn il-fażi storiċi biex imbagħad nikkonċentraw fuq il-post tat-Twelid tal-Mulej, li nqimuh fl-Għar-Knisja tan-Natività, li jagħmel parti mill-kumpless ta’ għerien naturali li huma mħaffrin fil-blat tar-raħal ta’ Betleħem, li jixref fuq l-għoljiet tal-Lhudija mdawwar bil-widien li jieħdu lejn id-deżert tal-Lhudija u l-Baħar il-Mejjet.