Għażla ta' kitbiet b'xi spunti għar-riflessjoni kritika - l-għaxar kapitlu

Abstract

Dan il-kapitlu fih għadd ċkejken ta' siltiet bil-Malti, tmintax b'kollox. Is-siltiet ta' poeżija huma testi sħaħ, filwaqt li dawk tal-proża u tad-drama huma partijiet qosra minn testi bil-wisq itwal. Dan l-ammont huwa ftit imqabbel mal-ħtiġijiet ta' kors ta' studju li dan il-ktieb immirat lejh. Min-naħa l-oħra, huwa l-ewwel pass sod f'mixja itwal ta' tentattivi ta' qari kritiku ta' testi bil-Malti. Dawn il-kitbiet, misluta minn perjodi differenti tal-letteratura Maltija, għandhom temi differenti, varjati fl-istil, u partikulari fil-mod kif il-kittieb ittratta jew ħares lejn is-suġġett. B'hekk, huma bidu tajjeb għal min jixtieq ikollu ċans iqiegħed fil-prattika bosta mill-ideat, pariri, u metodi misjuba f'dan il-ktieb. Xejn ma jwaqqaf lill-għalliema u l-lekċerers, u forsi wkoll lill-istudenti nfushom, milli jagħżlu oħrajn li jħossu li jagħnu l-proċess ta' tagħlim tal-qari tal-letteratura.