Bil-kliem tista’ tpitter : qafas strutturat għat-tagħlim tal-kitba deskrittiva mis-snin bikrin sas-snin sekondarji

Abstract

F’din id-dissertazzjoni ssir analiżi dettaljata tal-funzjoni retorika tal-kitba deskrittiva fil-kuntest tat-tagħlim tal-Malti bħala lingwa nattiva. B’referenza għax-xogħlijiet mill-oqsma tar-retorika, il-filosofija, l-istilistika u l-pedagoġija, il-kitba deskrittiva se tkun mistħarrġa biex jinkixfulha l-karatteristiċi partikolari tagħha. Jiġu analizzati wkoll, b’għadd ta’ eżempji, il-kuntesti soċjali varji li fihom titħaddem b’saħħa din il-funzjoni retorika. Il-parti prattika tissejjes fuq il-prinċipji u l-prattiċi tat-tagħlim tal-kitba bħala proċess.

Wara stħarriġ kritiku ta’ xi dokumenti kurrikulari barranin u tas-Sillabi tal-Malti, din id-dissertazzjoni tipproponi qafas kurrikulari rraġunat tal-kitba deskrittiva mis-Snin Bikrin sa tmiem l-iskola Sekondarja. Dan il-qafas kurrikulari tfellel f’kategoriji ewlenin li jiżviluppaw b’mod imtarraġ mas-snin: il-vokabolarju, is-sensi, il-karattri, l-ambjent, il-qagħda emozzjonali, in-narrazzjoni, u l-lingwa figurattiva. Wara, kampjun ta’ lezzjonijiet se jagħti togħma ta’ kif tista’ tiġi mgħallma, valutata, u ddifferenzjata l-kitba deskrittiva f’livelli differenti tas-sistema edukattiva formali.

Din id-dissertazzjoni tagħlaq bir-riflessjoni tar-riċerkatriċi tal-proġett u x-xogħol li pproponiet, b’risq il-bidla li għandha ssir f’livelli ta’ ppjanar kurrikulari min-nies interessati f’dan il-qasam. B’hekk, l-għalliema u l-istudenti t’għada jista’ jkollhom għarfien aktar ċar ta’ din il-funzjoni retorika tant ta’ fejda fil-ħajja ta’ kuljum.