Mill-Arkivji : Programme 63 : Sabrina Calleja Jackson

Abstract

Fil-programm ‘Mill-Arkivji’ tal-5 ta’ Mejju 2024 se niltaqgħu ma’ Sa Sabrina Calleja Jackson, arkivista fl-Istitut Nazzjonali Awdjo-Viżwali (NAVI) fi ħdan l-Arkivji Nazzjonali ta’ Malta. L-irwol ta’ Calleja Jackson hu li tippreserva tejps awdjo, films, ritratti, CDs, eċċ, flimkien mal-iżvilupp ta’ skemi ta’ klassifikazzjoni, katalogar u għajnuna għas-sejba għal dan il-materjal.

Sabrina Calleja Jackson, għandha grad ta’ Maġisteru fil-Fine Arts, Siti u Arkivjar mill-Università ta’ Central Lancashire, Preston, ir-Renju Unit. Esperjenzi preċedenti jinkludu Program Executive fi Spazju Kreattiv, St James Cavalier li jiffoka fuq il-programmi tal-arti viżiva u taċ-ċinema, inkluż is-sorveljanza ġenerali u l-arkivji ta’ xogħlijiet tal-arti li jiffurmaw parti mill-Kollezzjoni Nazzjonali ta’ Malta. Ħadmet ukoll bħala Kuratur f’Heritage Malta - MUŻA, il-Mużew tal-Arti, fejn assistiet lill-Kuraturi Anzjani u Prinċipali fit-tmexxija ta’ kuljum tal-mużew u l-arkivjar, ir-reġistrazzjoni, u l-katalogar ta’ artefatti li jiffurmaw parti mill-kollezzjoni tal-Mużew.

Sabrina Calleja Jackson se titkellem fit-tul fuq il-ħidma tagħha ta’ katalogar u l-modi ta’ preservazzjoni fuq il-kwantita’ kbira ta’ materjal awdjo-viżiv li għandu l-Arkivji Nazzjonali bil-għan li dawn ikunu wkoll aċċessibbli. Titkellem fuq il-kollezzjonijiet ta’ Herbert Frederick Rogers, Stanley Fraser, Ġużeppi Galea, George Said, u l-films li kellu Cecil Satariano fost kollezzjonijiet oħra. Magħhom jissemmew ukoll iż-żigarelli tal-għana ta’ Leli Muscat li ġew diġitizzati. Kif jitnaddfu r-ritratti u l-filmati, u xi jsir għall-preservazzjoni tagħhom? X’jinvolvi l-katalogar tagħhom?

Is-Sa Calleja Jackson titkellem ukoll fuq il-proġett tal-European Digital Treasures li l-Arkivji Nazzjonali huwa fost is-seba’ istituzzjonijiet imsieħba minn seba’ pajjiżi Ewropej li qed jikkolaboraw f’dan il-proġett. Diġa ttellgħu tliet wirjiet, u fil-preżent fi Spazju Kreatiiv fil-Belt hemm wirja ta’ films qosra mwassla mill-Arkivji Nazzjonali. Il-wirja li hi fi ħdan il-proġett tat-Teżori Diġitali Ewropej titratta dwar il-ġestjoni ta’ arkivji ċentinarji fis-seklu 21. Dawn il-films qosra huma maħluqa minn dawn is-seba’ istituzzjonijiet kulturali Ewropej. Il-wirja li hi bla ħlas se tibqa miftuħa sat-12 ta’ Mejju. Għal aktar tagħrif żur is-sit tat-Teżori DIġitali Ewropej.