It-tagħlim elementari governattiv fl-ewwel snin tas-seklu għoxrin f'Ħal Kirkop

Abstract

Fit-tieni nofs tas-seklu dsatax, in-nies bdiet tifhem l-importanza ta' xi tip ta' struzzjoni pubblika. Sa dan iż żmien, it-tagħlim kien isir ftit li xejn u maġġoranza tat-tfal kienu jitilgħu f'injoranza kbira. L-irħula iżda, kienu f'sitwazzjoni ferm agħar mill-ibliet. Il-livell ta' l-edukazzjoni tal-poplu kien baxx ħafna. Ħal Kirkop kien jifforma parti mis-Sitt Distrett għall-finijiet u effetti tad-Dipartiment ta' l-Edukazzjoni u dan flimkien ma' l-iskejjel taż-Żurrieq, l-Imqabba u l-Qrendi. F'Ħal Kirkop, dak iż-żmien konna nsibu skola elementari minn Standard I sa IV, skola ta' bil-lejl li fil-bidu kienet għas-subien biss, sakemm fl-1920 infetħet skola għall bniet ukoll u skejjel taż-żgħar (infant schools) għall-bniet u għas-subien li nfetħu fl-1905. Ma kienet teżisti l-ebda skola privata fis-Sitt Distrett kollu. Kien biss fiż Żejtun li kien hemm skola li tiftaħ il-Ħadd. Kien ukoll fil-bidu tas-seklu għoxrin, li l-awtoritajiet bdew jiddiskutu jekk l-edukazzjoni kellhiex tkun obbligatorja jew le peress li l-attendenza tat-tfal fl-iskejjel kienet tonqos drastikament matul is-Sena Skolastika.