Meta l-Iskola Primarja tal-Mosta waqfet tuża l-Oratorju Qalb ta’ Ġesù : ħarsa lejn uħud mid-dokumenti uffiċjali

Abstract

Id-deċiżjoni tal-edukazzjoni obbligatorja ġabet magħha żewġ problemi serji: l-ewwel xejn kien hemm bżonn ir-reklutaġġ ta’ iktar għalliema, li bilfors uħud minnhom ma kienx se jkollhom lanqas il-minimu tal-kwalifiċi meħtieġa biex jgħallmu u kien hemm bżonn ukoll l-iskejjel infushom, fejn se jsir it-tagħlim għaliex issa l-influss kien se jikber ħafna. Kien hemm bżonn infrastruttura sħiħa biex takkomoda b’mod komdu lil dawn l-istudenti kollha. Fil-fatt, f ’diversi rħula, il-gvern kien beda jikri d-djar mingħand il-privat biex dawn iservu ta’ skejjel u klassijiet. Din il-miżura offriet sfida għax wara kollox dak il-bini ma kienx inbena biex ikun skola imma għal għan residenzjali. Biex in-nies tgħix u toktor fih. Fil-fatt, “fil-Mosta, l-iskola bdiet għal nofs is-seklu dsatax. Fl-1858, il-bini li fih kien hemm l-iskejjel tal-Mosta kien mikri liri fis-sena.” Erbgħin sena wara nbena apposta bini fi Triq Grognet biex iservi ta’ skola primarja. Fil-Mosta, l-Oratorju tal-Qalb ta’ Ġesù, mekka importanti u storika fil-kultura żagħżugħa Mostija, minbarra l-impenji li għalihom kien twaqqaf fosthom it-tixrid tat-tagħlim tal-Katekiżmu Nisrani, kien hemm żminijiet meta l-Oratorju kien jilqa’ fih l-istudenti tal-iskola primarja.