It-tagħlim tal-partiċipju passiv fil-Malti

Abstract

Għażilt li nittratta t-tagħlim tal-partiċipju passiv (PP) lil studenti tal-ewwel lingwa (L1) bl-għan ewlieni li noħloq taħriġiet dwar il-PP fl-iskejjel sekondarji. Bdejt billi tajt ħarsa lejn it-tifsira ta’ grammatika u l-kriterji pedagoġiċi tagħha fit-tagħlim tal-L1, b’mod speċjali l-proċess tat-tinqija li lokalment ġie studjat minn Camilleri Grima (2020). Wara, analizzajt il-morfoloġija tal-PP Semitiku ta’ kull forma verbali bħal mv12ū3 ta’ ‘maqtul’, li ġieli tvarja skont jekk il-PP hux ġej minn verb sħiħ jew dgħajjef, is-suffissi tal-PP Rumanz -at, -ut u -it u xi irregolaritajiet. Dan għamiltu biex nistħarreġ it-tagħlim tal-PP skont l-iskaluni, il-kisbiet u s-sillabi, u x’inhu mistenni mill-istudenti fil-karti tal-eżamijiet. Biex il-forom partiċipjali jinftehmu mill-istudenti, Iddeċidejt li minn din it-taqsima nibda nissimplifikahom. Ngħidu aħna, il-forma mv12ū3 inbidlet f’mVKKuK,. Il-qofol tat-teżi ntlaħaq billi ħejjejt ħdax-il lezzjoni b’riżorsi tradizzjonali u diġitali dwar il-PP Semitiku għal studenti tad-disa’ sena ta’ Rotta 3. Il-kriterji pedagoġiċi li kkunsidrajt huma l-motivazzjoni tal-istudenti, il-kontenut u r-rabta mas-sillabi, l-attwalità, l-awtentiċità u l-preċiżjoni, il-proċess tat-tinqija, il-kunsiderazzjonijiet soċjali, l-awtonomija tal-istudenti, is-soċjokulturaliżmu u t-tagħlim kollaborattiv, id-disinn tekniku u d-disinn istruzzjonali.