Editorjal : Franġiskani tal-Kustodja martri f’Damasku

Abstract

Nhar il-Ħadd 20 ta’ Ottubru l-Papa Franġisku se jikkanonizza fi Pjazza San Pietru grupp ta’ 8 Patrijiet Franġiskani tal-Kustodja tal-Art Imqaddsa u 3 lajċi Kristjani Maroniti, li ġew maqtulin b’mod barbaru minn Drużi fil-kunvent ta’ Bab Touma f ’Damasku matul il-lejl bejn id-9 u l-10 ta’ Lulju 1860. Dawn il-martri kienu: P. Manuel Ruiz López, Spanjol ta’ 56 sena, li kien is-superjur tal-fraternità Franġiskana ta’ Bab Touma; P. Carmelo Bolta Bañuls, Spanjol ta’ 57 sena; P. Engelbert Kolland, Awstrijak ta’ 33 sena; P. Nicanor Ascanio Soria, Spanjol ta’ 46 sena; P. Nicolás Alberca Torres, Spanjol ta’ 30 sena; P. Pedro Nolasco Soler Méndez, Spanjol ta’ 33 sena; Fra Francisco Pinazo Peñalver, Spanjol ta’ 58 sena; Fra Juan Jacob Fernández, Spanjol ta’ 52 sena. Magħhom mietu Francesco Massabki, Abdel Mooti Massabki u Raffaele Massabki, kollha kemm huma aħwa Kristjani Maroniti, li kienu benefatturi tal-patrijiet u kienu jgħinuhom fl-attivitajiet pastorali u fit-tmexxija tal-kunvent.