Korintu

Abstract

Il-belt ta’ Kórinthos (Korintu) hi belt moderna li tinsab ftit kilometri bogħod mill-fdalijiet arkeoloġiċi tal-belt ta’ Korintu fl-era klassika u fl-era Kristjana. Archaia Kórinthos (Korintu l-Antika) tinsab xi 80 kilometru fuq il-punent ta’ Ateni, fil-penisola tal-Peloponnesos, li antikament kienet tissejjaħ Akaja. Ġeografikament kienet tiddomina għonq dejjaq ta’ art bejn żewġ ibħra, jiġiferi l-Golf ta’ Korintu fuq il-punent u l-Golf Saroniku fuq il-lvant. Il-belt kienet mibnija xi 90 metru fuq il-livell tal-baħar. Billi kellha l-baħar fuq iż-żewġ naħat, kienet ċentru importanti, għax kellha żewġ portijiet, il-port ta’ Lechaeum fuq il-Golf ta’ Korintu, bi żbokk lejn il-Baħar Jonju, u l-port ta’ Cenchreae fuq il-Golf Saroniku, bi żbokk lejn il-Baħar Eġew. Illum il-ġurnata dan l-għonq ta’ art hu maqsum mill-Kanal ta’ Korintu, li tħaffer bejn l-1882 u l-1893, u li llum jużawh diversi biċċiet tal-baħar u vapuri tal-merkanzija, li hekk iqassru l-vjaġġ bejn ix-xaqliba tal-punent u dik tal-lvant tal-Mediterran, għax jevitaw li jkollhom iduru mal-penisola tal-Peloponnesos. Il-fdalijiet tal-belt antika huma dominati mill-belt-fortizza ta’ Acrocorinthis, li togħla 575 metru fuq il-livell tal-baħar. L-iskavi arkeoloġiċi ta’ Korintu bdew fl-1896 u kixfu partijiet kbar tal-belt klassika.