Il-verbi Maltin onlajn : gwida għall-istudenti u l-għalliema tal-Malti u tal-Malti bħala lingwa barranija

Abstract

Dan il-ktejjeb jispjega proġett imsejjaħ ‘Maltitek’ li sar fl-Università ta’ Malta sabiex jiġi stabbilit sit tal-verbi Maltin li jkun jista’ jintuża fit-tagħlim tal-Malti mill-għalliema u mill-istudenti, kif ukoll minn kull min jikteb bil-Malti. L-idea ta’ dan il-proġett ħarġet mill-ħtieġa li l-lingwa Maltija tkompli dejjem tistagħna b’riżorsi li jgħinu lil kull student u utent fil-ħtiġijiet ta’ tagħrif u tiftix dwarha. Mhux l-ewwel darba li bħala edukaturi tal-Malti ntlabna minn diversi persuni, anke minn uħud li ma kellhom x’jaqsmu xejn mas-sistema edukattiva, biex infissrulhom xi ħaġa dwar il-verb, speċjalment kif jinkitbu l-verbi bil-għ. Meta mbagħad beda jiżdied it-tagħlim tal-Malti bħala Lingwa Barranija, aktar kibret il-ħtieġa li jkollna għodda li tħaffef it-tagħlim tal-verb bil-Malti. Fost oħrajn, dan għaliex il-verb, b’mod partikolari, joffri sfidi ta’ natura partikolari.