Mill-Arkivji : Programme 92 : Anton Quintano

Abstract

Il-mistieden fil-programm ‘Mill-Arkivju’ tat-23 ta’ Marzu 2025 huwa s-Sur Anton Quintano. Quintano huwa storiku, ex-edukatur li għallem il-Ġeografija fil-livell terzjarju u kien Kap tad-Dipartiment tal-Ġeorgrafija sal-irtirarr tiegħu fl-2017. Għandu baċċellerat, maġisteru kif ukoll diploma fl-amministrazzjoni edukattiva.

Quintano huwa membru ta’ diversi għaqdiet volontarji li jippromwovu l-Istorja u l-wirt ta’ Malta. Huwa kkontribwixxa b’għad ta’ artikli u papers għal Heritage, Sacra Militia Foundation u Melita Historica. Il-kotba u l-artikli tiegħu dwar l-iskwadra marittima tal-Ordni ta’ San Ġwann li kisbulu reputazzjoni bħala storiku marittimu ta’ skala internazzjonali.

Ippubblika wkoll kotba u artikli li jittrattaw l-istorja tal-Forti Ricasoli, il-belt twelidu Raħal Ġdid, is-swar u l-militar in ġenerali, kif ukoll l-istorja soċjali. Huwa promotur tal-kunċett Braudelian tal-importanza tal-ġeografija f'avvenimenti u esperjenzi storiċi.

Huwa ppubblika wkoll il-bijografija spiritwali tal-Qaddejja ta’ Alla, il-koppja Henry u Inez Casolani, kemm bil-Malti (2004) kif ukoll bl-Ingliż (2005). Il-kawżi tagħhom għall-Beatifikazzjoni u l-Kanonizzazzjoni għadha kemm ġiet meħuda f’Ruma u Anton huwa viċi-postulatur tal-kawżi tagħhom.

Huwa jirrakonta kif bdiet ir-riċerka fuq il-Forti Ricasoli wara li l-Prof Godfrey Wettinger kien qallu li jista’ jsib diffikulta biex isib id-dokumentazzjoni. Quintano beda jqalleb il-volumi fil-Bibljoteka u kiteb it-teżi tiegħu fuq il-Forti Ricasoli u wara ppubblika.

B’mod l-aktar dettaljat, Quintano jgħid kif wettaq ir-riċerka fuq il-bastimenti tal-iskwadra marittima tal-Ordni ta’ San Ġwann matul is-seklu 18. Jagħti wkoll dettalji dwar liema kienu l-aktar bastimenti li l-Ordni għamel użu minhom fit-taqbid.

Lejn tmiem il-programm jitkellem fuq ir-riċerka u l-kompilazzjoni ta’ dokumenti li ħadmet fuqhom martu għall-Beatifikazzjoni u l-Kanonizzazzjoni tal-qaddejja t’Alla, il-koppja Henry u Inez Casolani. Min kienu dawn? X’impenn kellhom fis-soċjetà ta’ madwarhom?