Ġużè Bonnici - ħajtu u ħidmietu

Abstract

Ġużè Bonnici twieled minn ġenituri Għawdxin, fid-dar 34, Triq Alessandru, Valletta, fl-14 ta' Awissu 1907. Beda jmur l-iskola primarja tal-Belt meta kellu ħames snin. Sena wara tilef lil ommu, ġrajja li ħalliet il-marka tagħha fuq ħajtu. Il-familja tiegħu bagħtuh jistudja fis-Seminarju t'Għawdex. Qrabatu Għawdxin jiftakruh bħala tifel kwiet, dejjem medhi b'xi ktieb. Bonnici telaq mis-seminarju ftit xhur qabel tmiem l-aħħar sena u ġie lura Malta. Kompla l-istudji tiegħu fl-iskola ta' San Pawl il-Belt minn fejn, wara sentejn, temm il-kors tal-Matrikola. F'Ottubru 1924 daħal fl-Universita' biex jistudja l-mediċina. Fl-1928 kiseb il-grad ta' B.Sc u sena wara ħa l-Ph.C, waqt li fl-1 ta' Ottubru 1931 ħa l-lawrja ta' tabib, flimkien ma' erbatax-il student ieħor, fosthom Rużar Briffa. Bonnici wera interess kbir fil-qagħda politika tal-pajjiż u sa mill-1926 kien wieħed mill-aktar membri ħabrieka fi ħdan il-Partit tal-Ħaddiema. Fl-1934 iżżewweġ lil Evelyn Testa u kellhom tlett itfal: Margaret, May u John. Huwa miet fis-6 ta' Ottubru 1940.