Editorjal

Abstract

Illum bosta jitkellmu dwar il-biża’ li l-Malti bħala lsien jispiċċa, anki minħabba l-influss bla kontroll ta’ barranin li deħlin fil-gżejjer tagħna u l-idea li ladarba hemm l-Ingliż allura huwa obbligu tagħna li nikkomunikaw magħhom b’dan l-ilsien internazzjonali minflok ninsistu fuq il-fatt li huma huma li għandhom jitgħallmu l-ilsien Malti jekk iridu jgħixu u jaħdmu f’pajjiżna. Minkejja din il-biża’ u paradossalment, hemm moviment totalment oppost: qed nirreferi għan-numru kbir ta’ pubblikazzjonijiet li kull sena qed joħorġu għad-dawl, u dan fl-ilsien Malti. Dawn huma kotba li jintrabtu ma’ ġeneri u suġġetti differenti: ir-rumanz, il-poeżija, in-novella, ir-riċerka, l-arti, l-istorja, u bosta oqsma oħrajn.