Il-festa ta’ Ħannukâh

Abstract

Min hu midħla tat-tradizzjonijiet bibliċi Lhud ġie li ra l-kandelabru li minnu joħorġu sitt fergħat, tlieta fuq kull naħa. Dan hu l-Menorah, jew il-kandelabru li Alla ordna lil Mosè biex iqiegħed fit-tinda tal-laqgħa fil-Ktieb tal-Eżodu 25,31-32.37: “Int tagħmel ukoll imnara tad-deheb fin; tagħmilha tad-deheb mastizz: is-sieq u l-bastun tagħha, bil-ġewż u ż-żibeġ u ż-żahar, ikunu biċċa waħda magħha. Joħorġu sitt friegħi mill-ġnub tagħha, tliet friegħi min-naħa u tliet friegħi min-naħa l-oħra [...] Agħmel seba’ msiebaħ għaliha u qegħedhom fuqha biex jixegħlu madwarha.” Dan il-kandelabru kien jitqiegħed in-naħa tan-nofsinhar tat-tinda tal-laqgħa, faċċata tal-mejda bil-ħobż tal-preżenza, quddiem il-purtiera li kienet tifred il-Hekal (Qaddis) mid-Debir (Qaddis tal-Qaddisin) (Eżodu 26,35).