San Ġorg Preca, San Mikiel u l-knisja tal-Karmelitani fl-Mdina

Abstract

Dun Ġorġ Preca kellu devozzjoni kbira lejn San Mikiel u rrikmanda lill-membri tas-Soċjetà tal-M.U.S.E.U.M. biex nhar San Mikiel ma jaħdmux u jinġabru għal tliet laqgħat: waħda filgħodu, waħda wara nofsinhar, u oħra filgħaxija. F'dan il-jum, l-Arloġġ Musewmin kien jiġi rreċitat b’mod solenni u xbieha ta’ San Mikiel kienet titpoġġa fuq l-altar tal-kappella tal-qasam. Sebgħa fjakkli jew bozoz tad-dawl kienu jinxtegħlu fuq il-bjut tal-oqsma bħala sinjal ta’ qima. Barra minn hekk, kienu jsiru wkoll "iljieli ta' San Mikiel," li kienu laqgħat ta' talb u kant li jibdew fil-lejl ta’ bejn it-28 u d-29 ta’ Settembru. Dawn il-laqgħat kienu jinkludu mixja lejn il-knisja, riflessjoni fis-skiet, talb, u ikel sempliċi bħalma huma ħobż, ġbejniet, basal u ftit inbid. L-ewwel laqgħa saret fil-Knisja tal-Karmnu fl-Imdina fl-1924, fejn Dun Ġorġ kien jistenniehom biex flimkien jitolbu u jkantaw. Il-laqgħa kienet mimlija devozzjoni, talb, u penitenza, u kompliet issir għal ħafna snin f’diversi knejjes madwar Malta. L-aħħar waħda saret matul it-Tieni Gwerra Dinjija, u wara ma ġietx organizzata aktar.