Magħquda fid-diversità? Il-Fratelli Tutti u l-ospitalità fil-kuntest Ewropew

Abstract

Fis-sena 2000 l-Unjoni Ewropea għażlet il-motto tagħha: “Magħquda fid-Diversità” (United in Diversity, jew In varietate Concordia bil-Latin). Dan il-motto huwa wieħed mill-ħames simboli tal-Unjoni Ewropea li ssemmew fl-abbozz tat-Trattat Kostituzzjonali flimkien mal-bandiera, l-innu, il-munita ewro, u Jum l-Ewropa. Minkejja li dan it-Trattat ma kienx ratifikat, dawn is-simboli żammew it-tifsira tagħhom. L-għażla ta’ dan il-motto hija sinifikanti ħafna. L-ewwel nett, motto ma jirriflettix il-passat, imma jislet leitmotif mill-passat biex ifisser jew jippreżenta l-futur. It-tieni, motto jgħinna nifhmu kif organizzazzjoni jew pajjiż jara lilu nnifsu. It-tielet, motto jtina xi ħjiel dwar il-karattru ta’ dik l-organizzazzjoni. Il-motto tal-Unjoni Ewropea jurina li, skont l-istess entità, il-pluralità u d-diversità huma s-saħħa ta’ dan il-proġett. Iżda llum, il-kelma “diversità” saret waħda mimlija tifsiriet.