Mill-Arkivji : Programme 96 : Christian Attard

Abstract

Fil-programm ‘Mill-Arkivji’ tal-20 ta’ April 2025 ħa niltaqgħu ma’ Dr. Christian Attard. Huwa Ħa jkellimna fuq ir-riċerka li għamel li ssarrfet f’diversi pubblikazzjonijiet. Dr. Attard huwa lettur fid-Dipartiment tal-Arti u l-Istorja tal-Arti fl-Università ta’ Malta.

Ilu jgħallem fl-Iskola tal-Arti għall-bosta snin u t-temi l-aktar li jinteressawh jinkludu l-mod kif ix-xbihat għandhom saħħa jittrasformaw l-esperjenza umana. Għandu interess partikolari wkoll dwar kif l-istorja tal-arti kif żviluppat mill-aħħar snin tas-seklu dsatax għall-ewwel deċenji tas-seklu għoxrin.

Ippubblika diversi papers akkademiċi u l-pubblikazzjonijiet ‘Gianni Vella (1885-1977): The Life and Work of a twentieth century Maltese Artist’, u ‘The Art of Dying Well, Visual Culture in Times of Piety and Plague’, it-teżi tad-dottorat tiegħu. Huwa editur ta’ diversi pubblikazzjonijiet dwar l-istorja tal-arti f’Malta, fosthom ‘Ta’ Ġieżu Crucifix’, ‘Antoine Camilleri, A World Within’, u ‘Contagion and Visual Culture in the Central Mediterranean’.

Chris jagħtina perspettiva wiesgħa dwar l-artist Giuseppe Briffa (1901-1987) u l-kontribut li ta fl-arti sagra tiegħu li tinsab f’diversi knejjes madwar Malta u Għawdex. Jitkellem ukoll dwar il-ħidma artistika ta’ Gianni Vella (1885-1977), kif ukoll fuq Antoine Camilleri (1922-2005) li ħalla impatt fuq l-arti moderna u kontemporanja.

X’nifhmu biha ‘kultura viżwali’? Kif inhi riflessa fl-ikonografija fl-epidemiji tal-pesti l-kbar f’Malta, dik tal-1676 u l-1813-14, u l-mewt?