Ġużè Aquilina : kif nafu jien

Abstract

Lil Ġużè Aquilina sirt nafu għall-ewwel darba mill-kotba. Kont ili li bdejt niddedika ruħi għall-qari u għat-tgħarbil tal-kotba Maltin sa mill-aħħar snin tal- ħamsinijiet meta la kienet moda li tħobb il-Malti, kif għadna ngħidu, u wisq anqas li tistudjah bir-reqqa u tidher fil-pubbliku b'kotba Maltin f'idek. Kien għadu ż-żmien li tistenna lil xi għalliem ta' l-iskola stess jitfa' xi kumment negattiv dwar il-Malti. Mhux darba u tnejn ġrali hekk jien ukoll; sibt ruħi fi klassi fejn l-għalliem deherlu li għandu jirrimarka b'mod ta' disprezz dwar il-Malti, u niftakar bi pjaċir li kemm-il darba kien hemm bżonn dendilt kusi ma' min inzerta. Sħabi kellhom sentimenti mħallta dwar il-lingwa, u kull min kien jidher dedikat, kif ma kienx suppost f'sistema edukattiva li kienet (jew għadha?) tagħti xi sagħtejn biss fil-ġimgħa lit-tagħlim tal-Malti, kien jitqies bħala l-iffissat, il-fanatiku.