L-intensitajiet spiritwali fil-ġabra Għera ta’ Gioele Galea

Abstract

It-tema prinċipali mistħarrġa f’dan l-istudju hija l-intensitajiet spiritwali fil-ġabra poetika Għera tal-kittieb kontemporanju Gioele Galea. Il-versatilità assoċjattiva u allużiva fil-kitba tiegħu tixhed, b’diversi modi, kif il-lirika tista’ tapprofondixxi l-ansjetajiet tar-ruħ. Dan l-istudju jinqeda b’Għera bħala kampjun ta’ din il-versatilità letterarja. Il-ġabra poetika ta’ Galea tippreżenta d-diversi modi ta’ kif il-vulnerabbiltà għerja tal-kittieb tikkundizzjona l-qagħda spiritwali tiegħu. Għaldaqstant, din ir-riċerka tanalizza x’tip ta’ għera hi: jekk hijiex korporali, spiritwali, verbali, topografika – jew dawn kollha f’mixja lirika waħda misluta minn djarju intimu tar-ruħ. Fuq kollox, tanalizza wkoll il-kawżi ta’ din il-qagħda ta’ għera dominanti fil-kitbiet poetiċi ta’ din il-ġabra. Dan l-istudju qasir jirrifletti d-dinamika kunfliġġenti tas-sensibilità lirika ta’ dan il-poeta, li sikwit tirreġistra l-movimenti interjuri ta’ ruħu f’poeżija konċiża iżda mimlija teknika li tipproblematizza l-esperjenza reliġjuża.