Id-demokrazija... għal min?

Abstract

Id-demokrazija hija kelma li nħobbu nużaw spiss imma qajla nieqfu u naħsbu xi tfisser tassew. Ħafna jaħsbu li pajjiż ikun demokratiku għaliex ikun hemm elezzjoni kull tant żmien u ċ-ċittadini jistgħu jagħmlu għażliet ħielsa tal-kandidati u tal-partiti. Din hi idea xejn profonda ta’ x’inhi d-demokrazija, għaliex iċ-ċittadin għandu rwol żgħir fejn tidħol it-tmexxija tal-pajjiż. Rwol limitat għal ftit minuti fil-kamra tal-votazzjoni. Ħafna drabi n-nies ftit jixtarru għal xiex ikunu qed jivvutaw. Jaf ikollhom grazzja ma’ kandidat, jew dejjem ivvutaw għall-istess partit. Ġieli biddlu l-partit għax talbu pjaċir li ma ngħatalhomx. Tant ma naħsbux dwar lil min nivvutaw, li nħoloq terminu – donkey vote – għal dawk li jivvotaw billi jibdew iniżżlu l-preferenzi tagħhom minn fuq tal-lista tal-kandidati u jibqgħu niżlin, mingħajr biss jaraw lil min qed jagħtu appoġġ u jekk il-kandidat ħaqqux l-appoġġ. Dan il-mod ta’ votazzjoni fih innifsu huwa wkoll theddida għall-proċess demokratiku. [excerpt]