Paċi u propaganda fil-kuntest ta’ Gaża

Abstract

Ix-xahar ta’ Settembru 2025 għalaq bl-aħbar li ‘intlaћaq ftehim dwar Gaża’. Il-President Amerikan Donald Trump sejjaħ il-proposti tiegħu stess bħala opportunità tad-deheb għal ftehim storiku u “paċi eterna” f’reġjun bi 3,000 sena ta’ tensjonijiet, gwerer u tixrid tad-demm. L-opinjoni pubblika globali donnha ħadet nifs kbir ’il ġewwa. Ħsibna li hemm mnejn li jintemmu l-attakki Iżraeljani fuq il-Palestinjani mġewħa u trawmatizzati. Għedna forsi fl-aħħar jippermettu li jidħlu f’Gaża l-provvisti tal-ikel u mediċinali tant meħtieġa. Ittamajna li jinħelsu l-ostaġġi Iżraeljani li kienu se jagħlqu sentejn maħtufa mill-Ħamas. Hemm kienu f’Washington s-Sur Trump u Benjamin Netanyahu quddiem il-midja internazzjonali. Ħabbru ‘deal’ li kellu l-appoġġ ta’ wħud mill- “pajjiżi Għarab u Musulmani” (New York Post, 2025). Xaqq ta’ dawl wara abbiss ta’ dlam, li iżda fuq medda twila mhux se jiggarantixxi la paċi u lanqas stabbilità.