Il-kuntest tal-kunflitt Għarbi-Iżraeljan

Abstract

Biex inkunu ċari din mhix kitba li se timmoralizza fuq suġġett li, madankollu, pożizzjoni morali dwaru wieħed ma jistax ma jiħux. Fis-sens, biex nibqgħu fuq ġrajjiet li seħħew fi żminijiet reċenti, wieħed ma jistax ma jikkundannax l-attakk barbaru tas-sebgħa ta’ Ottubru 2023, il-martirju li għaddew/għaddejjin minnu l-ostaġġi, il-massakru ta’ ċivili f’Gaża mill-armata Iżraeljana, u l-qtil bil-ġuħ ta’ nies innoċenti minħabba l-azzjonijiet tal-Gvern Iżraeljan. L-istess huma kundannabbli l-attakki minn Iżrael fuq pajjiżi f’dik in-naħa tad-dinja, li ġabu riskju li l-kunflitt ikompli jikber fi gwerra reġjonali. Fil-każ tal-Qatar ukoll, ġie attakkat pajjiż li seta’ jkun medjatur. Biex ma nsemmux inġustizzji li ilhom snin, bħal ngħidu aħna l-fatt li l-Palestinjani ma kellhomx ċans ikollhom stat. Kif għedt, imma, l-għan ta’ din il-kitba mhix li tagħti ġudizzju morali ta’ min għandu raġun jew tort.